नेपाल खानेपानी संस्थान वीरगंज उप- महानगरपालिकालाई हस्तान्तरण गर्ने तयारी

वीरगंज, १६ असार। नेपाल खानेपानी संस्थानले गर्दै आएको खानेपानी आपूर्तिको काम केही महिनापछि वीरगंज उपमहानगरपालिकाले गर्ने भएको छ। 

वीरगंजस्थित खानेपानी संस्थान शाखा कार्यालय वीरगंज उपमहानगरपालिकालाई हस्तान्तरण गर्ने आवश्यक तयारी भइरहेको जानकारीमा आएको छ। 

खानेपानी संस्थान शाखा कार्यालय वीरगंजले दैनिक ८० हजार लिटर खानेपानी उत्पादन गरी ७ हजार दुइ सय ग्राहकलाई वितरण गर्दै आइरहेको छ। वीरगंज उपमहानगरपालिकामा १ लाख ५० हजार जनसंख्याको चांप रहेको र घरधुरी संख्या १९ वटामा करिब ३० हजार रहेको एक स्रोतले बताएको छ। 

लोडसेडिङ भएको बेला जेनेरेटर संचालन गरेर ग्रँहकहरूलाई नियमित पानी उपलब्ध गराउंदै आएको खानेपानी संस्थान वीरगंज शाखाको पानी महसुल बांकी बक्यौता ४ करोड रूपैयां रहेको छ। पानी महसुल बांकी बक्यौता संकलन गर्न र समयमा पानी महसुल नबुझाउनेलाई जति पत्राचार गरे पनि बडो मुस्किलले पानी महसुल बुझाउन आउने गरेको एक सुपरभाइजरले बताएका छन्। 

पानी महसुल वापत मासिक १५ लाख संकलन हुने गरेको खानेपानी संस्थान वीरगंज शाखामा स्थायी कर्मचारी २९, करार कर्मचारी ६ र दैनिक ज्यालादारी २६ जना कार्यरत छन्। 

वीरगंजको कूल जनसंख्यामध्ये २५ प्रतिशतलाई मात्र नेपाल खानेपानी संस्थानले खानेपानी आपूर्ति गर्दै आइरहेको छ। बांकी जनसंख्याले जमिनमुनी जडान गरिएको टयुबबेलको पानी प्रयोग गर्दै आइरहेका छन्। टयुबबेलको पानीमा आर्सेनिक पाइएकोले धेरै मानिस पानी पिउन डराइ रहेका छन्। नेपाल अधिराज्यको विराटनगर, भद्रपुर, धरान, लहान, राजविराज, जनकपुर, जलेश्वर, मलगंवा, गौर, कलैया, वीरगंज, हेटौडा, भरतपुर, बुटवल, भैरहवा, तौलिहवा, कृष्णनगर, महेन्द्रनगर, धनगढी, बनेपामा नेपाल खानेपानी संस्थानको शाखा कार्यालय छन्। प्रधान कार्यालय काठमाडौंमा रहेको छ। नेपाल खानेपानी संस्थानले आपूर्ति गर्दै आएको काठमाडौं उपत्यकामा पानीको आपर्ूर्ति यतिखेर निजी क्षेत्रको खानेपानी कम्पनीले गरिरहेको छ। नेपाल खानेपानी संस्थान नेपाल सरकारको स्वामित्वमा रहेको छ।