चितवन बिहानैदेखि ठप्प

-भरत पाण्डे । चितवन, ०१ असार/ नेपाली कांग्रेशका कार्यकर्ता गोविन्द पौडेलको हत्यारालाई तत्काल कारवाहि गर्न माग गर्दै दवाव समुहले गरेको बन्दका कारण चितवन विहानै देखि ठप्प छ। हत्यारालाई पक्रन र कारवाही गर्न प्रशासनले नसकेको भन्दै आज एक दिनका लागि दवाव समूहले जिल्ला बन्दको आह्वान गरेको हो । बन्दका कारण चितवनका बजार क्षेत्रमा यातायातका साधनहरु चलेका छैनन् । त्यस्तै शिक्षण संस्था, बजार, कलकारखाना सवै बन्द छन् । भरतपुर-१० निवासी "गोपी" भनिने गोविन्दको हत्या भएको एक महिना बितिसक्दा पनि प्रशासनले हत्यारा पत्ता लगाउन सकेको छैन । हत्या भए लगत्तै पटक-पटक प्रशासनलाई घचघच्याउँदा पनि यसको बेवास्ता गरिएको आरोप समूहले लगाएको छ । दवाव समूहले भोलि विहान सांढे १० वजे चितवन जिल्ला अदालतमा धर्ना दिने कार्यक्रम समेत तय गरेको छ । गत जेठ ४ गते हतियारधारी समूहको आक्रमणबाट गोविन्दको ज्यान गएको थियो।