काठमाडौं, १९ असार । स्थानीय विकासमन्त्री पूर्णकुमार शेर्माले थप ४१ वटा नगरपालिका गठनका लागि अन्तिम तयारी भइरहेको बताएका छन्। आज रिपोर्र्टर्स क्लब नेपालको साक्षात्कारमा बोल्दै सय दिनभित्र थप नगरपालिका गठन खुलासा गरे।
दलहरुको राजनीतिक संयन्त्र गठन गरी स्थानीय निकायलाई प्रभावकारी बनाइने बताएका छन् । तत्काल निर्वाचन हुने अवस्था नहरहेकाले दलहरुको सहमतिमा संयन्त्र बनाएर विकास निर्माणको काम अगाडि बढाइने बताए । स्थानीय निकायमा पदाधिकारी नहुदा काम गर्न समस्या आयो, मन्त्री शेर्माले भने, तत्काल राजनीतिक संयन्त्र गठन गरी काम अगाडि बढाइनेछ । राजनीतिक संयन्त्र गठनको आधारबारे सोधिएको प्रश्नमा सबै बसेर सहमतिबाट तय हुने बताए । सहमति, सहकार्य र एकताको विकल्प नभएको भन्दै स्थानीय तहबाट त्यसको सफल परीक्षण हुनुपर्ने बताए ।
दलहरुबीच सहमतिमा जोड दिदै राष्ट्रि्य सहमतिको सरकार गठनमा जोड दिए। जसले सहमति बनाउन सक्छ उसैको नेतृत्वमा सहमतिको सरकार बन्नुपर्ने बताए। शेर्माले भने, सहमतिमा जो पनि सरकारको नेतृत्वमा पुग्नसक्छ ।
नगरपालिका संघका अध्यक्ष डोरमणि पौडेलले तत्काल स्थानिय निकायको रिक्त पदाधिकारीको विकल्प दिन आग्रह गरे । दलहरुले सहमति बनाएर स्थानीय निकायको कामकाजलाई प्रभावकारी बनाउनुको विकल्प नभएको बताए।
गाविस राष्ट्रिय महासंघका महासचिव भीमप्रसाद ढुंगानाले ११ वर्षम्म स्थानीय निकायको निर्वाचन हुननसकेकाले समस्या आएको बताए । तल्लो तहमा विकासनिर्माणमा समस्या आएको उल्लेख गर्दै भने, स्थानीय तहमा राजनीतिक पदाधिकारी नहुदा बेवास्ता भएको छ।
जिविस महासंघका प्रवक्ता कृष्णप्रसाद जैसीले स्थानीय निकायमा पदाधिकारी नहुँदा केन्द्रीकरण बढेको बताए । विकेन्द्रीकरणमा जानुपर्ने ठाउँमा तल्लो तहमा संयन्त्र कमजोर हुदा विकास निर्माण प्रभावकारी हुन नसकेको बताए ।
नेपाली कांग्रेसका मुख्यसचिव रामचन्द्र पोखरेलले लोकतान्त्रिक प्रणालीलाई बलियो बनाउनका लागि स्थानीय निकाय बलियो बनाउनुपर्नेमा जोड दिए। स्थानीय निकायप्रति बेवास्ता भए लोकतन्त्र बलियो हुने उनको भनाई थियो ।
Comments
Post a Comment