पत्रकार यादवले जाटियाको घर कब्जा गरेको आरोप

वीरगंज, ५ साउन । वीरगंज- ७ निवासी विश्वनाथ जाटियाले स्थानीय एक पत्रकारले घर भाडा नदिइ आफनो घर कब्जा गर्न खोजेको आरोप लगाएका छन्।
आज रिपोर्टस क्लब नेपाल पर्साको साक्षात्कारमा बोल्दै जाटियाले न्याय दिलाइदिन संचारकर्मीसंग आग्रह गर्दै सो कुरा बताएका हुन्।
वीरगंज-१४ ओम आश्रममा रहेको आफनो घरमा स्थानीय पत्रकार काशीनाथ यादवले विगत ३ वर्षेखि भाडामा लिइ बसोबास गर्दै आइरहेको भए तापनि हालसम्म भाडा नदिएको र घर खाली गर्न अटेर गरेको जाटियाले बताए।
जाटियाले भद्रभलादमीहरुको सिफारिसमा पत्रकार यादवलाइ घर दिइएको बताउंदै हाल सो घर विक्री गर्नु पर्ने भएकोले पटक पटक घर खाली गर्न भन्दा अटेर गरेपछि यसबारेमा जिल्ला प्रशासन कार्यालयमा निवेदन दिएपनि न्याय पाउन नसकेको भन्दै पत्रकारको शरणमा आएको बताए।
पत्रकार सम्मेलनमा जाटियाले जुनसुकै बेला घर छाडने शर्तमा मासिक १ हजारमा भाडा लगाएको, वैनापट्टाको कुनै कागज नगरेको आफूले ५ धुर जग्गा दिने बचन दिएको बताए।
यता पत्रकार काशीनाथ यादवले उजुरीको प्रतिवाद गर्दै ५ वर्ष का लागि घर लिजमा लिएको, घर जग्गाको संरक्षण गर्न आफनो ६ लाख खर्च भएको र घर खरिद गर्न जाटियालाई ५ लाख बैना गरेको दाबी गरेका छन्।