राष्ट्रपतिको कदम सच्याउनुपर्ने मागमा कुनै सम्झौता नहुने, आन्दोलन जनविद्रोहमा परीणत हुन सक्ने चेतावनि

राष्ट्रपतिको कदम सच्याउनुपर्ने मागमा कुनै सम्झौता नहुने, आन्दोलन जनविद्रोहमा परीणत हुन सक्ने चेतावनि
पोखरा साउन २३
एकिकृत माओवादीका अध्यक्ष पुष्पकमल दाहाल प्रचण्डले आजदेखि शुरु हुने माओवादी आन्दोलन जनविद्रोहमा परीणत हुने चेतावनि दिनु भएको छ । नागरीक सर्वोच्चताको विषयमा उठाएको मागको बारेमा कुनै सम्झौता नहुने स्पष्ट पार्दै माओवादी अध्यक्ष प्रचण्डले राष्ट्रपतिको कदमको विषयमा सदनमा छलफल गरौं भन्ने सामान्य कुरा नमानेर देशमा मुठभेड निम्त्याउन खोजिएको बताउनु भयो ।
आज पोखरामा माओवादी तमुवान राज्य समितिले आयोजना गरेको पत्रकार भेटघाटमा बोल्दै पूर्व प्रधानमन्त्री प्रचण्डले आन्दोलन शान्तिपूर्ण हुने जानकारी दिनुभयो । "माओवादी आन्दोलन शान्तिपूर्ण र जनतालाई दुःख नदिने प्रकृतिका छन्" उहाँले भन्नुभयो : "यही आन्दोलनलाई जनताले जनव्रि्रोहमा परीणत पनि गर्न सक्छन् ।"
प्रचण्डले आफु फेरी जनसेनाको सुप्रिम कमाण्डर भएको, माओवादीले स्थानिय सत्ता बिउँझाएको लगाएताका झुट्टा कुराको हल्ला चालाएर माओवादीलाई फेरी युद्धमा फर्काउने षडयन्त्र भईरहेको भन्दै माओवादीले त्यस्तो षडयन्त्रलाई असफल पार्ने दावि गर्नुभयो । नागरीक सर्वोच्चताको विषयलाई सामान्य अर्थमा हेर्न नहुने बताउँदै प्रचण्डले नागरीक सर्वोच्चता कायम नभएसम्म संविधान नलेखिने खतरा बढ्ने समेत बताउनु भयो ।
प्रधानसेनापतीलाई कारबाहि गर्ने निर्णय विरुद्ध राष्ट्रपतिले चालेको कदमको विषयमा संसदमा बहस गर्ने वातावरण मिलाएमा, भोटिङ भएमा आफुहरुको प्रस्ताव अल्पमतमा परेपनि स्विकार्य हुने उहाँको धारणा थियो । माओवादी आन्दोलनको बारेमा प्रधानमन्त्री माधवकुमार नेपाल, पूव प्रधानमन्त्री सूर्यबहादुर थापा र उपप्रधानमन्त्री विजयकुमार गच्छदारबाट आएका अभिव्यक्तिहरुप्रति प्रचण्डले आपत्ति प्रकट गर्नुभयो ।
"माओवादीको बारेमा अब सोच्नै पर्छ भन्ने प्रधानमन्त्रीको भनाई व्यक्तिगत हैन आकाशवाणि हो ।" अध्यक्ष प्रचण्डले भन्नुभयोः "उहाँले सबै कुरा आकाशवाणिमा जे आउँछ, त्यही भन्नुहुन्छ ।" राजनीतिक सहमति कायम गर्ने संयन्त्र निर्माण गर्ने काम कांग्रेस सभापति कोईरालाकै कारण ओझेलमा परेको उहाँको भनाई थियो । कोईरालाले संयन्त्रको संयोजकमा परराष्ट्रमन्त्री सुजाता कोईरालालाई राखौं भनेपछि त्यसले गति लिन नसकेको जानकारी दिनुभयो ।
पत्रकार सम्मेलनमै माओवादीका वरीष्ठ उपाध्यक्ष मोहन वैद्य किरणले माओवादी नेतृत्व एक ढिक्का भएको बताउँदै जनताको संविधान निर्माण गर्ने दिशामा माओवादी अगाडी बढ्ने बताउनु भयो । अर्का वरीष्ठ उपाध्यक्ष डा.बाबुराम भट्टराईले माओवादीले आन्दोलन फिर्ता लिने कुनै संभावना नरहेको बताउनु भयो । नागरीक सर्वोच्चताको विषयमा अब माओवादीले कसैसंग सम्झौता गरेर अगाडी वढ्न नसक्ने स्पष्ट पार्दै उपाध्यक्ष भट्टराईले वैशाख देखि नै माओवादीले आन्दोलन स्थगित गरेर सहमतिको बाटो खोजेकोले अब आन्दोलन स्थगित हुन नसक्ने जिकिर गर्नुभयो ।
कार्यक्रमको अध्यक्षता तमुवान राज्य समितिका संयोजक हितराज पाण्डे उत्तमले गर्नुभएको थियो ।