शान्ति प्रकृया विथोल्न षडयन्त्र - प्रचण्ड

वीरगंज ६ भदौ . एकिकृत नेकपा माओवादीका अध्यक्ष पुष्पकमल दाहाल प्रचण्डलॆ संविधान निर्माण र शान्ति प्रकृया स्थायित्व चाहने हो भने प्रधानसेनापति प्रकरणमा संसदमा दर्ता गरिएको संकल्प प्रस्तावमा माथि छलफल र मतदान गर्ने व्यवस्था मिलाउन सरकारसंग माग गरेका छन्।
आज वीरगंजको होटल मकालुमा आयोजित पत्रकार सम्मेलनमा कांग्रेस र एमालेप्रति लक्षित गर्दै उनले एकात्मक ढंगले शासन चलाउने सोच भएका पार्टीहरुलाई शासन गर्ने कुनै अधिकार नभएको बताए।
माओवादी बाहेक अन्य दलसंग संघीयताको विषयमा कुनै भावि योजना नभएकोले मधेशको भावना अनुरुप माओवादी मात्र सरकार संचालन गर्न सक्षम रहेको बताउंदै प्रचण्डले भने- माओवादीको माग पूर्ण लोकतान्त्रिक छ।
प्रचण्डले सरकार संचालनको नेतृत्व गर्न जनादेश पाएको माओवादी पार्टीलाई पाखा लगाएर हरुवा दलहरुले लोकतन्त्रलाई कमजोर पार्ने र शान्ति प्रकृया विथोल्ने षडयन्त्र गरेकेा आरोप लगाए।
उनले अहिलेका प्रधानमन्त्री माधवकुमार नेपालको भारत भ्रमण इतिहासकै सवैभन्दा लज्जास्पद भ्रमण भएको टिप्पणी गर्दै भारतका संचारमाध्यमहरुले गरेको बेवास्थाले त्यो पुष्टि भएकेा प्रचण्डले बताए। आन्दोलनलाई प्रभावकारी बनाउन देशव्यापी रुपमा प्रशिक्षण कार्यक्रम संचालन गरेको बताए।