प्रधानमन्त्रीको भारत भ्रमणमा वीउवासंघको सहभागिता

वीरगंज, ७ भदौ .प्रधानमन्त्री माधव कुमार नेपालको नेतृत्वमा गत भदौ २ गतेदेखि ६ गतेसम्म भएको मित्र राष्ट्र भारतको सद्भावना भ्रमणमा सहभागी रहनु भएका वीउवासंघका उपाध्यक्ष अशोक बैध आज वीरगंज फर्कनु भएको छ ।

प्रधानमन्त्री नेपालको सद्भावना भ्रमणका सम्बन्धमा आज उहाँसँग भएको संक्षिप्त कुराकानीमा सम्पन्न वाणिज्य सन्धी र दुई पक्षीय आर्थिक सम्बन्ध विस्तारका दिशामा भ्रमण उपलब्धीमूलक भएको धारणा उपाध्यक्ष बैधले व्यक्त गर्नुभयो ।

विशेष गरेर सन् १९९६ को वाणिज्य सन्धीको मर्म र भावना अनुरुप नै यस पटक सम्पन्न भएको वाणिज्य सन्धीले नेपालको उद्योग व्यापारको प्रबद्र्धन र विकासमा ठूलो टेवा पुग्ने विश्वास निजी क्षेत्रले राखेको कुरा बैधले एक भेटमा बताउनुभयो । उहाँले वीउवासंघले पटक-पटक उठाउँदै आएको औद्योगिक मेशिनरी र उपकरण मर्मत सम्भार गर्न भारततर्फ पठाउन हालको झन्झटिलो व्यवस्थालाई सजिलो बनाउने माग यस पटकको सन्धीमा समाविष्ट गरिएको छ जुन उद्योगी व्यापारीका लागि अत्यन्तै सकारात्मक रहेको छ ।

प्रधानमन्त्रीको भ्रमणका क्रममा मित्र राष्ट्र भारतले देखाएको गहिरो चासो सद्भाव र आतिथ्यता अत्यन्तै प्रशंसनीय रहेको र दुवै देशका निजी क्षेत्रबीच मुम्बईमा भएको आर्थिक लगानी विस्तार सम्बन्धी छलफलले समेत भारतीय लगानी स्वदेश भित्रिन सक्ने प्रबल सम्भावना रहेको कुरा श्री बैधले भेटका क्रममा बताउनुभएको छ ।

उहाँका अनुसार भारतले प्रधानमन्त्रीको भ्रमणलाई उच्च प्राथमिकतामा राख्दै हुलाकी सडक निर्माण लगायत अन्य विकास निर्माणका लागि ३२ अर्बको सहयोग गरेको समेत बताउनु भएको छ ।