उद्योगीहरु पर्यावरण संरक्षणप्रति गम्भीर

वीरगंज ९ भदौ । वीरगंज उद्योग वाणिज्य संघ तथा नेपाल उद्योग वाणिज्य महासंघले हानिकारक फोहर मैला व्यवस्थापन तथा उर्जा संरक्षण विषयक एक दिने कार्यशाला गोष्ठी आयोजना गरेको छ। सो कार्यक्रममा वीरगंज-पथलैया औद्योगिक कोरिडोरका प्रमुख उद्योगहरुको प्रतिनिधिहरुको उपस्थिति रहेको थियो ।

उद्योगबाट निस्कने ठोस ग्यांस र तरल फोहरहरुको उचित व्यवस्थापन गरेर पर्यावरणलाई सुरक्षिँत राख्नुको साथै मुनाफा पनि बढाउन सकिने कुरा संघका अध्यक्ष ओमप्रकाश सिकारियाले दिनुभएको स्वागत भाषणमा भन्नुभयो ।

कार्यक्रममा प्रमुख अतिथिको आशनबाट बोल्दै संजय गिरीले प्रदूषण नियन्त्रणको लागि भविष्यमा आउने नियम कानून र विनियमप्रति उद्योगहरु सचेत हुन आवश्यक भएकोले यसप्रकारको गोष्ठी आवश्यक भएको कुरा भन्नुभयो । पर्यावरण फोरमका अनिल शंकर गिरीले पर्यावरण व्यवस्थापन विषयमा कार्यपत्र प्रसतुत गर्नुभयो । सोही संस्थाका उत्तम कुंवरले औद्योगिक फोहर मैला व्यवस्थापन विषयमा कार्यपत्र प्रस्तुत गर्नुभएको थियो । यस्तै विशेषज्ञ रमेश नेपालले उर्जा संरक्षण विषयमा कार्यपत्र प्रस्तुत गर्नुभएको थियो । उद्योग मन्त्रालयका विशेषज्ञ प्रभातकुमार िसंहले औद्योगिक प्रदूषण नियन्त्रण सम्बन्धी कानूनी व्यवस्थाहरुबारे गोष्ठीमा जानकारी गराउनुभएको थियो । संघका वरिष्ठ उपाध्यक्ष अशोक कुमार टेमानीले यस गोष्ठीबाट कोरिडोरका उद्योगहरु लाभान्वित हुने आशा व्यक्त गर्नुभयो । गोष्ठीमा धन्यवाद ज्ञापन संघका उपाध्यक्ष अशोक वैद्यले दिनुभयो भने कार्यक्रम संचालन मनोज उपाध्यायले गर्नुभएको थियो ।