उपप्रधानमन्त्री विजय गच्छेदारमाथि चप्पल प्रहार

वीरगंज, ११ मंसिर । बाराको गढीमाइ मेलामा दर्शन गर्न पुगेका उपप्रधानमन्त्री विजय चप्पल प्रहार भएको छ।
आज बिहान हेलिकप्टरबाट मेला स्थल पुगेका उपप्रधानमन्त्री गच्छदारलाइ लक्षित गरी चप्पल प्रहार भएपछि मेलास्थल तनावग्रस्त भएको थियो।
एमाओवादीका कार्यकर्ताहरूले हेलिकप्टरबाट गढीमाईको दर्शन गर्न त्यहाँ पुगेका उपप्रधानमन्त्री गच्छदारसहित पर्यटनमन्त्री शरदसिंह भण्डारी, भौतिक योजना तथा निर्माण सहायकमन्त्री कलावती पासवान, संसदीय विकास समिति संयोजक जितेन्द्र सोनल, सभासद गोविन्द चौधरी लगायतलाई कालो झण्डा देखाउने क्रममा एक नाम नखुलेका माओवादी कार्यकर्ताले उपप्रधानमन्त्री गच्छदारलाई चप्पल हाने हुन्।
चप्पलले सोझै नलागेपनि उपप्रधानमन्त्री गच्छेदारको छेउमा खसेको थियो। माओवादी कार्यकर्ताले चप्पल प्रहार गरेपछि प्रहरीले लाठी प्रहार गर्न सुरू गरेको थियो। लाठी प्रहारका कारण विहान १० बजेदेखि ११ बजेसम्म मेलास्थल तनावग्रष्त बनेको थियो। प्रहरीको लाठी प्रहारबाट दुई दर्जनभन्दा बढी माओवादी र केही श्रद्धालुहरू घाइते भएका छन्।
घाइतेहरूको मेलामा सञ्चालित शिविरमा उपचार भैरहेको चिकित्सक डा. अख्तर रेजाले बताएका छन्। डा. रेजाका अनुसार अधिकांश घाइतेहरूको टाउको र हातखुट्टामा चोट लागेको छ।
त्यसैगरी, मेलामा खानाको कुपन बाँड्ने क्रममा झडप हुंदा एक प्रहरीको टाउको फुटेको जनाइएको छ।