वीरगंज, २३ पुस। नेपाल कांग्रेसका कार्यवाहक सभापति सुशील कोइरालाले आज वीरगंज नगर सभागृहमा आयोजित जिल्लास्तरीय कार्यकर्ता भेलालाई सम्बोधन गर्दै गिरिजाप्रसाद कोइराला वृद्ध भइसक्नुभएको छ, उहांलाई राष्ट्रपतिको मोह नरहेको उल्लेख गर्नुभयो।
देशको शान्ति प्रक्रिया नेकपा माओवादीकै कारण नै विग्रिदै गएको भन्दै नेकपा माओवादी गैरजिम्मेवार कुरा गर्दै हिडिरहेको बताउनुभयो। उहांले सेनाको मनोबल घटाउन जर्नेललाई बर्खास्त गर्नु र रुक्मांगत कटवाल प्रकरणमा विवाद उठाउनु सत्ता कब्जा गर्ने षडयन्त्रको पर्दाफास भएको बताउनुभयो।
कोइरालाले राष्ट्रपतिले चालेको कदम राष्ट्रिय हितमा रहेको भन्दै उहांको कदमलाई सम्मान गर्नुपर्ने बताउंदै सरकारले राष्ट्रपतिको तस्बिरलाई सरकारी कार्यालयमा नराखेकोमा दुखेसो पोख्नुभयो।
उहांले एनेकपा माओवादीले अहिले नयां नारा राष्ट्रिय स्वाधीनताको उचाल्दै हिडिरहेका छन् भने अर्कातर्फ भारतलाई मालिक भन्ने माओवादीले सुगौली सन्धि, सन् १९५० को सन्धिको लगायतको कुरा उठाएर जनतामा भ्रम फैलाइरहेको आरोप लगाउनुभयो।
कोइरालाले राष्ट्रियता मधेशीमा रहेको स्व. वीपी कोइरालाले भन्नुभएको स्मरण गर्दै आफूहरुको तीन पुस्ता मधेशमै रहेको र आफू पनि मधेशी भएकोमा गर्व गर्नुभयो।
माओवादीले हत्या, हिंसा, आतंक फैलाई नागरिक स्वतन्त्रताको कुरा गर्दै हिडेको छ तर उनीहरुले नै पत्रकारको हत्या, झन्डा गाडेर घर-जमिन कब्जा गरी जनतामा त्रास फैलाइरहेको आरोप लगाउनुभयो।
कार्यक्रममा मर्यादाक्रम अनुसार मंचमा नेका महिला संघ र नेविसंघका अध्यक्षहरुलाई नबोलाएको भन्दै केही बेर विवाद भएपछि प्रहरीले लाठीचार्ज गरेको थियो। पर्साका जिल्ला सभापति अजय कुमार द्विवेदीको सभापतित्वमा सम्पन्न कार्यक्रममा सभासद् रमेश रिजाल, ओमप्रकाश शर्मा, अजय चौरसिया, तथा पूर्व मन्त्री सुरेन्द्रचौधरीको उपस्थिति थियो ।
Comments
Post a Comment