वीरगंज, १५ असार। भंसार राजस्व छलेर भारत निकासी गर्न लागेको के. के. क्रसरको ढुंगा लोड गरेको टिपर भंसार कर्मचारी एवं सशस्त्र प्रहरीद्वारा पक्राउ गरि वीरगंज भंसार दाखिला गरेकोमा उक्त ढुंगा वीरगंज भंसारका प्रमुख केवलप्रसाद भण्डारीले चेकजांच बिना नै छाडेका छन्।
आर्थिक विधेयक २०६५ ले ढुंगाको भंसार मूल्याकंन २.५ इन्चको ढुंगामा प्रतिघन मिटर ९० रूपैयां एवं सोभन्दा माथिको प्रति घनमिटर ३५० रूपैयां कायम गरिएकोमा विगत लामो समयदेखि उक्त क्रसर कम्पनीले वीरगंज भंसारबाट २.५ इन्चभन्दा माथिको ढुंगा ९० रूपैयांकै दरले भंसार राजस्व काट्न लगाइ भारत निकासी गर्दै आएकोमा सो दिन भंसार कर्मचारी एवं सशस्त्र प्रहरीलाई शंका लागि चेकजांच गर्दा राजस्व छली ठूलो ढुंगा भारत निकासी गर्न लागेको फेला पारेपछि वीरगंज भंसारमा दाखिला गरेका थिए।
वीरगंजका उद्योगी, व्यवसायी पिताम्बर मुन्काले संचालन गरेको क्रसर कम्पनीको ना ३ ख २९९८, ४०३५, ६२६८, ३२७०, २९९६, ४०३३ नम्बरको टिपरबाट उक्त ढुंगा भारततर्फ लान लाग्दा पक्राउ गरिएको थियो।
भंसारकै कर्मचारी कर्ण बहादुर विष्ट एवं बलबहादुर श्रेष्ठको मिलोमतोमा क्रसर कम्पनीका एजेण्ट, सिर्द्धार्थ क्लियरिङका दीपक भण्डारीले कम राजस्व तिरी भंसार पास गराउंदै आएको तथ्य उजागर भएपश्चात पनि सो पक्राउ गरिएको टिपरसहितको ढुंगा बिना चेकजांच नै प्रतिवेदनका आधारमा भंसार प्रमुख केवल भण्डारीले छाडेको प्रतिक्रिया दिए।
सो घटना सम्बन्धमा भंसार प्रमुख भण्डारीसंग बुझ्न खोज्दा उनले उद्योगले खटाएको इन्जिनियरले टिपरमा रहेको ढुंगा अढाइ इन्च भित्रै रहेको प्रतिवेदनको आधारमा चेकजांच गरी हामीले छाडेको बताए। उनले नियमित जाने टिपरलाई अनलोड गरी चेकजांच गर्ने ठाउं समेत नरहेको हुंदा छाड्नुपरेको बताए।
पत्रकार गुप्ताले स्थानीय संचारकर्मीहरूले टिपरमा चढी फोटो खिंचेको प्रमाण हुंदाहुंदै पनि तपाईंले ढुंगा चेकजांच नै नगरी उद्योगद्वारा खटाइएको इन्जिनियरले दिएको प्रतिवेदनकै आधारमा ढुंगा छाड्नु भंसार ऐनविपरित कार्य गर्नुभएको त होइन भनी प्रश्न गर्दा भंसार प्रमुखले मैले आज बिहान जथाभावी समाचार प्रकाशित एवं प्रशारण भएको सुनें, पत्रिका हेरेको छैन, एक-दुइवटा ढुंगा टिपरमा ठूला साइजका होलान्, त्यस्कै आधारमा टिपर र ढुंगा जफत गर्नु भएन भन्ने प्रतिक्रिया दिए।
Comments
Post a Comment