वीरगञ्ज, १५ कात्तिक । पर्सा जिल्लाको सदरमुकाम वीरगञ्जलाई आर्थिक नगरीका रुपमा परिभाषित गरिए पनि पर्सर्ााे दुर्गम वस्तीहरुमा अझै पनि बत्ती पुग्न नसकेपछि स्थानीयवासीहरु टुकीको भरमा रात काट्न बाध्य छन् । सदरमुकाम वीरगञ्जबाट ६८ किलोमिटर सुदूरउत्तरमा रहेको ठोरी र सोही गाविसमा जोडिएको निर्मलवस्ती गाविसका १५ सय भन्दा बढी परिवार अझै पनि टुकीको भरमा रात बिताउन बाध्य भएका हुन् । छिमेकी देश भारतसँग जोडिएका यी गाविसका स्थानीयवासीहरु भारतमा बलेको बिजुली हेरेर चित्त बुझाउनुबाहेक अर्को विकल्प नभएको गुनासो गर्छन् । करिब दुइ वर्षअघि निर्मलवस्ती ठोरी विद्युतीकरण योजनाअनुसार सो गाविसमा बिजुलीको पोल गाडिएको भए पनि हालसम्म बत्ती आउन नसकेपछि गाउँलेहरु चिन्तामा परेका छन् । तत्कालीन समयमा गाडिएको बिजुलीको पोल पनि जीर्ण बन्दै गइरहेको र बिजुली वितरणको सम्बन्धमा आफूले पटकपटक सरोकारवालासँग माग गरे पनि सुनुवाइ नभएपछि आफू हैरान भएको उपभोक्ता समितिका अध्यक्ष आशबहादुर गुरुङले गुनासो गर्नुभयो ।रासस