-उत्तम खड्गी वीरगंज, २० पुस । एक भारतीय मोटरसाइकल चालकले हेलमेट नलगाएको भन्दै चेकजांच गर्ने क्रममा एक ट्राफिक प्रहरीले घुस खान नपाएपछि बन्दूक उठाएर विद्यार्थीहरुलाइ तर्साएका छन्। आज वीरगंजको अलखियामठमा खटिएका ट्राफिक प्रहरी सूर्य शिवाकोटीले बी आर ०५०डि ८७८२ नं.को मोटरसाइकललाइ हेलमेट नलगाएको भन्दै घुस माग्न थालेपछि विद्यार्थीले हस्तक्षेप गर्दा उनले त्यस्तो गरेका हुन्। मोटरसाइकल चालकले जरिवाना तिर्न खोजेपनि शिवाकोटीले रसिद नकाटेपछि विद्यार्थीले हस्तक्षेप गर्दा रिसले मुरमुरिदै जनपथ प्रहरी जवानको बन्दूक खोसेर विद्यार्थीउपर ताकेको विद्यार्थीले बताए। ट्राफिक प्रहरी शिवाकोटीले विद्यार्थीहरुले हुलहुज्जत गरेको भन्दै आफूले त्यस्तो गरेको बताए। पछि सो मोटरसाइकल चालकले कुनै जरिवाना नतिरेर गएका थिए।