वीरगंज ५ पुस, । जिल्ला प्रहरी कार्यालय पर्साले जिल्लाका विभिन्न गाविसमा लगाइएको अवैद्य लागू औषध गांजा खेती फडानि गर्ने कार्य तिव्र पारेको छ । पहिलो चरण अन्तर्गत शुक्रबार र शनिबार जिल्लाको स्वर्णपुर, निर्मलवस्ति, ठोरी र शंकरसरैया गाविसको सार्वजनिक, वन तथा खोला क्षेत्रहरुमा लगाईएका करीव १५ विगाहाको गांजा खेती काटेर नष्ट पारेको छ । जिल्ला प्रहरी कार्यालय पर्साका प्रहरी सहायक उपरीक्षक मसाउद अलि खांको नेतृत्वमा खटेको टोलीले जिल्लाको चार गाविसको करीव १५ विगाहा क्षेत्रफलमा लगाईएको गांजा खेती काटेर नष्ट गरेको जिल्ला प्रहरी कार्यालय पर्साले जनाएको छ । पहीलो चरण अन्तर्गत २ दिन सार्वजनिक क्षेत्रहरुमा लगाईएका गांजा कटान गरीएको र अबको केहि दिन भित्रै दोस्रो चरणको योजना तय गरी निजि जग्गाहरुमा लगाईएका गांजा खेती नष्ट गर्ने अभियान थालनि गर्ने जिल्ला प्रहरी कार्यालय पर्साका प्रहरी निरीक्षक भुवनेश्वर साहले जानकारी दिनु भयो । जिल्लामा लगाईएका अधिकांश गांजा खेती नष्ट गर्ने अभियान थालिसकिएको समेत प्रहरी निरिक्षक साहले बताउनुभयो ।- अनलाइनखबर