-प्रणय कुमार .
वीरगंज, ३ असार। नेपालमा पहिलो पटक लेजर प्रविधिबाट खेत सम्याउने मेशिनको कृषि औजार अनुसन्धान केन्द्र रानीघाटमा सफल परीक्षण गरिएको छ। कृषि उत्पादनको लागि प्रयोग गरिने बीउ, मल, सिंचाइको लागि चाहिने पानी, श्रम तथा इन्धनको खपत कम गरी यस प्रविधिले कृषि उत्पादनमा करिब २०-२५ प्रतिशत उत्पादन वृद्धि हुने अनुमान गरिएको छ।
यो प्रविधि नेपालमा आइआरआरआइ सीएसआइएसए परियोजना अन्तरगत कार्यक्रम संचालनको लागि भित्रिएको हो। यस परियोजनामा फरवार्ड, विबिर्ड, कृषि तथा पशु विज्ञान अध्ययन संस्थान, जिल्ला कृषि विकास कार्यालयहरू रूपन्देही, नवलपरासी, चितवन, मकवानपुर, बारा र पर्सा) नेपाल कृषि अनुसन्धान परिषद अर्न्तर्गतका राष्ट्रिय गहुं बाली अनुसन्धान कार्यक्रम, भैरहवा, राष्ट्रिय मकैवाली अनुसन्धान कार्यक्रम रामपुर, चितवन, क्षेत्रीय कृषि अनुसन्धान केन्द्र परवानीपुर, बारा, कृषि औजार अनुसन्धान केन्द्र रानीघाट वीरगंज, राष्ट्रिय धानबाली अनुसन्धान कार्यक्रम हर्दिनाथ, धनुषा, आदि संस्थाहरू संलग्न छन्।
यो प्रविधि प्रदर्शनमा बारा, पर्सा तथा रौतहट जिल्लाका करिब १० जना टे्रक्टर भएका कृषकहरू, आइआरआरआइ सीएसआइएसए नेपालका मैनेजर डा. दिलप्रसाद शेरचन, जिल्ला कृषि विकास कार्यालय पर्साका प्रतिनिधिहरू, क्षेत्रीय कृषि अनुसन्धान केन्द्र परवानीपुरका अधिकृतहरू, कृषि औजार अनुसन्धान केन्द्र, रानीघाटका प्रमुख गणेश साह तथा अन्य प्राविधिक कर्मचारीहरू र स्थानीय पत्रकार, तथा टेलिभिजनका संचारकर्मीहरू गरी करिब ३५ जनाको सहभागिता थियो।
यो लेजर लेभलर मेशिन संचालन सम्बन्धी प्राविधिक जानकारी भारतबाट आएका व्यक्तिहरूले गराएका थिए।
Comments
Post a Comment