वीरगंज, २५ असार । विभिन्न मांग राख्दै सडक अतिक्रमण गर्ने र चक्काजाम गर्ने कार्यले तीव्रता पाइरहेको छ।
लगातार तीन दिनदेखि वीरगंज-पथलैया सडकखण्ड अवरुद्ध हुंदा हजारौं सवारीसाधनहरु अलपत्रमा परेका छन्।
आज बिहान पनि औद्योगिक कोरिडोरको विभिन्न स्थानहरुमा प्रदर्शनकारीले चक्काजाम गरेका छन्।
कारखाना व्यवस्थापन पक्षले मजदूरलाइ कुटपिट गरेको विरोधमा तीन दिनदेखि वीरगंजको बहुअरी स्थित नेशनल पोली प्लास्टका मजदूरहरुले वीरगंज-परवानीपुर सडकखण्डको गण्डकमा चक्काजाम गरेका छन्।
कारखाना व्यवस्थापनले केही महिना अघी कामदारलाइ निकालेको बिषयमा व्यवस्थापन पक्ष र मजदुर पक्षबीच झडप हुंदा ३ जना मजदुर घाइते भएपछि उपचार खर्च कारखानाले नै उपलब्ध गराउनुपर्ने मांग गर्दै सडक अवरुद्ध गरेका हुन्।
यसैगरी गए राति रामपुर टोकनी-३ नजिकै ना३ख ६६२८ नं.को बसले ना२प ९४४९ नं.को मोटरसाइकललाई ठक्कर दिंदा बारा, फत्तेपुर-३ बस्ने कर्ण कुमार राय र राजु राय र १४ वर्षीया करिष्मा राय घाइते भएपछि करिष्माको बाटोमा नै मृत्यु भएको थियो। सोही बिषयलाई लिएर पीडित पक्षले गए राति अवरुद्ध गरेको सडकखण्ड प्रहरीले सम्झाइबुझाइ सुचारु गरेको थियो। ठक्करदिने बस र चालकलाइ प्रहरीले पक्राउ गरेको छ।
आज बिहान बाराको अमलेखगन्ज -३ सागरचोकका स्थानियबासिन्दाहरुले तटबन्धको मांग गर्दै अवरुद्ध गरेको महेन्द्र राजमार्ग विहान पौने ११ बजे सुचारु भएको छ।
सो क्षेत्रमा रहेका क्रसरले जथाभावी ढुंगा निकाली घर र जग्गा कटान गरेको आरोप लगाउंदै स्थानीयवासिन्दाले सडक अवरुद्ध गरेका हुन् ।
खानेपानी तथा उपभोक्ता महासंघको पूर्व घोषित आन्दोलनको कार्यक्रम अनुसार आज पनि पूर्व-पश्चिम महेन्द्र राजमार्गको अमलेखगंज, सर्लाही, रौतहट, धनुषामा चक्काजाम गरिएको थियो।
उपभोक्ता महासंघ, सर्लाहीका अध्यक्ष डोलराज पाण्डेको नेतृत्वमा कर्मैया ४,६ र ७ र लालबन्दी १ स्थित डुमडुमे पुलमा बाटो अवरोध गरेका थिए। खानेपानी सरसफाई राष्ट्रिय उपभोक्ता महासंघ, धनुषाका भिम प्रसाद शर्माको नेतृत्वमा ढल्केचोकमा चक्काजाम गरिएको थियो।
उपभोक्ता महासंघले विभिन्न मांग राख्दै गत २० गतेको पूर्व घोषित आन्दोलनको कार्यक्रम अनुसार २४ गते देखि ३० गते सम्म दैनिक १ घण्टा र ३० गतेदेखि पूर्ण रुपमा चक्काजाम गर्ने निर्णय गरेको थियो।
यसैगरी सडक पिच गर्ने बजेट निकासा नभएको विरोधमा एमाले गाउं कमिटी रौतहटका सचिव शेष अमिनको नेतृत्वमा आज बिहान ७ः४५ बजेदेखि बीरेन्द्र राजमार्गमा बाटो अवरोध गरेको प्रहरीले जनाएको छ।
Comments
Post a Comment