वीरगंज, २५ असार। राजस्व चुहावट नियन्त्रणका लागि खटिएका वीरगंज भंसारका सशस्त्र प्रहरी नायब उपरीक्षक जनक बस्नेतले वीरगंज भंसारको कार्य सम्हालेको एक हप्ताभित्रै तस्करीको ठूलो लाइन संचालन गरेको भरपर्दो स्रोतबाट खुल्न आएको छ।
भारतको रक्सौलबाट बिलासिताका सामान, मोटरपार्टस एवं खाद्यान्न, लत्ताकपडा राजस्व छली वीरगंज भंसारको कम्पाउण्ड क्षेत्रबाहिर इनर्वा गाउंबाट नगरमा भित्र्याइने गरेको तस्करहरुले सशस्त्र प्रहरी नायब उपरीक्षक बस्नेतलाई मोटो रकम नजराना चढाइ सो लाइन लिएको स्रोतको भनाइ छ।
साइकलबाट भारत, अहिरवा टोला बस्ने रुपन यादव, टेम्पोबाट मोटरपार्टसका सामान वीरगंज भित्र्याउने तस्कर आनन्द लामा, मुन्ना तेली, फैयाज ठकुराइ, बलरामपुर गाविस वडा नं. २ का शशि लोहार, तस्कर शत्रुघन, किशनदेव यादव, प्रमोद, सुबोध, वीरेन्द्र, भारत पन्टोकाका राजुले मासिक निश्चित रकम दिएर सो लाइन लिएको निजहरुकै समूहमा काम गर्ने नाम उल्लेख गर्न नचाहने एक स्रोतले जनाएका छन्।
राजस्व नियन्त्रणका नाममा खुलेयाम तस्करी गर्न लगाई व्यापक राजस्व छलेर निहित स्वार्थसिद्ध गर्न थालेका सशस्त्र प्रहरी नायब उपरीक्षक बस्नेतको मिलीभगतले दैनिक २०औं लाखको राजस्व चुहावट भइरहेको बताइन्छ। यसरी खुलेयाम रुपले राजस्व चुहावट हुंदा समेत भंसार प्रमुख केवलप्रसाद भण्डारीले खासै चासो नदेखाउनुलाई शंकाको दृष्टिले हेन थालिएको छ।
Comments
Post a Comment