भारतले सम्झौताविपरित बांध बनाएको भन्दै आन्दोलनको चेतावनी

काठमाडौं, १७ साउन । भारतले सीमा क्षेत्रमा सम्झौताविपरित बांध, नहर तथा तटबन्धहरु निर्माण गर्दा पनि सरकार मुकदर्शक भएको भन्दै नेपाल नदी तथा बांध पीडित संघर्ष समितिले आन्दोलनको चेतावनी दिएको छ । आज रिपोर्र्टर्स क्लब नेपालमा पत्रकार सम्मेलन गरी नेपाल र भारतबीच भएका असमान सन्धी खारेजी, पानीमाथि नेपालको पहिलो अधिकार स्थापना, कोशी गण्डकका बाढी पीडितहरुको पुनरवासको व्यवस्थालगायतका १५ सूत्रीय माग राखी आन्दोलनको चेतावनी दिएको हो ।
संघर्ष समितिले नवलपरासी, कैलाशपुरलगायतका स्थानमा भएको डुबानप्रति ध्यानाकर्षण गराएको छ । उच्चबांध निर्माण गरेर नेपालका सयौं गाउँ डुबानमा पार्ने खतरा निम्त्याउन लागिएको भन्दै आपत्ती जनाएको छ ।
कार्यक्रममा गण्डक नदी नियन्त्रण संघर्ष समिति, कोशी नदी पीडित संघर्ष समिति, लक्ष्मणपुर बाँध पीडित संघर्ष समिति, महाकाली कर्णाली नदी पीडित संघर्ष समिति, फियान नेपाल र याक नेपालका प्रतिनिधिले सम्झौताविपरितका काम नगर्न भारतलाई आग्रह गरेका छन् ।