माओवादीसंग भारत रुष्ट

दीपेश केसी नयां दिल्ली २० भदौ । भारत एकीकृत नेकपा माओवादीप्रति निकै रुष्ट देखिएको छ । पशुपतिमा हालै गरिएको भट्ट नियुक्तिमा माओवादी निकट वाइसिएलको संलग्नतामा विरोध चर्काएपछि भारत रुष्ट देखिएको हो ।

भारतीय विदेशमन्त्रालयले भट्टहरुको सुरक्षामा ध्यानाकर्षण गराइएको उल्लेख गरेको छ । नेपालस्थित भारतीय दूतावासमार्फत सुरक्षाका विषयमा ध्यानाकर्षण गराएको भारतीइ विदेशमन्त्रालयले जनाएको छ । पशुपतिमा भारतीय मूलका भट्ट नियुक्तिपछि माओवादीको सहयोगमा विरोध चर्काएपछि भारतीय दूतावासले ध्यानाकर्षण गराएको हो । माओवादीतर्फ संकेत गर्दै जिम्मेवार राजनीतिक दल र नेपाल सरकारसंग दूतावासले छलफल गरिसकेको जनाएको छ ।

भारतीय राजदूत राकेश सुदले माओवादी अध्यक्ष प्रचण्डसंग भट्ट नियुक्तिमा माओवादीले देखाएको भूमिकाबारे कुराकानी गरेका छन् । उनले भारतीय भट्टमाथिको आक्रमणमा माओवादी कार्यकर्ताको संलग्नताबारे पनि प्रश्न उठाएको बुझिएको छ । यसअघि प्रचण्ड सरकारले नेपाली भट्ट नियुक्ति गर्दा व्यापक विरोध भएको थियो । नियुक्ति फिर्ता लिइएपछि पुरानै भट्टले पूजा जारी राखेका थिए।

त्यसपछि वर्तमान सरकारले दक्षिण भारतबाट भट्ट खोजेर ल्याएको थियो । गिरिश भट्ट र राघभेन्द्र भट्ट कर्नाटकबाट ल्याइएका हुन् । धर्म राजनीति भारतले पशुपतिको भट्ट नियुक्तिमा उठेको विवादलाई माओवादीको भारततर्फको दृष्टिकोणका रुपमा लिएको छ । भारतीय अधिकारीहरुले माओवादीसंग बिग्रदो सम्बन्धले पछिल्ला घटनाक्रम देखिएको बताएका छन् । माओवादीले आफ्नो नेतृत्वको सरकार ढल्नुमा भारतलाई प्रमुख कारण मान्दै आएको छ । माओवादी नेताहरुले सार्वजनिक रुपमै भारतका कारण प्रचण्ड सरकार ढलेको र माधव नेपाल सरकार बनेको बताइरहेका छन् । भारतले सेनापति प्रकरणमा समेत भूमिका खेलेको बुझाई माओवादीको छ । भारतले नेपाली सेनासंग भारतीय सेनाको राम्रो सम्बन्ध र भारतसंग जोडिएका संस्थालाई माओवादीले तारो बनाएको ठानेको छ । यसबाट भारतले माओवादीभत्र भारतविरोधी पंक्ति हावी भएको स्पष्ट देखिन्छ । भारतमा हिन्दूवादी हावी रहेको र हिन्दूहरुको आराध्य देव पशुपतिनाथमा उत्पन्न विवादमा माओवादी भूमिका रहेको भारतीय अधिकारीहरुको अभिव्यक्तिबाट स्पष्ट हुन्छ । आठ सय वर्ष देखिको परम्परा तोड्न खोज्नुभित्र गम्भीर राजनीतिक उद्देश्य निहित छ । शंकराचार्यले पशुपतिमा भारतीय भट्ट राख्ने र दक्षिणी भारतमा नेपाली ब्राम्हण राख्ने परम्पराले धार्मिक सांस्कृतिक अर्थ बोकेको छ । दुइ देशबीचको सम्बन्ध सुमधूर बनाउन स्थापित गरिएको संस्कृति धमिल्याउन खोजेको रुपमा भारतीयहरुले माओवादीलाई लिएका छन् । यसले माओवादीको भारतलाई हेर्ने दृष्टिकोण विगतभन्दा धेरै फरक भइसकेको विश्लेषण हुनथालेको छ ।