ट्राफिक व्यवस्थापनको अभावका कारण समस्या

वीरगंज, १४ कार्तिक। ट्राफिक व्यवस्थापन अभावका कारण दैनिक समस्या झेलिरहेका मिना बजारमा किनमेल गर्न जाने उपभोक्ताहरू निकै मर्कामा परेको गुनासो गर्न थालेका छन्। जिल्ला ट्राफिक प्रहरी कार्यालय पर्साको घण्टाघरस्थित खटिने ट्राफिक प्रहरीहरूको आर्थिक प्रलोभनका कारण बजार समयमा सो स्थानको सडक छेक्ने गरी राखिने ट्रक, बसले उक्त समस्या उत्पन्न गराएको भुक्तभोगीहरूको गुनासो छ।
सो क्षेत्रमा रहेका आलु, प्याजका गद्दीहरूका कारण दिनहुं बजार को समयमा सडकबाट हिडडुल गर्न समेत अप्ठयारो हुनेगरी राखिने गरेको सवारी साधन एवं छाडा गाइवस्तु का कारण कयौंपटक दर्ुघटनासमेत भएको उनीहरूको भनाइ छ।
एकोहोरो सवारी हिडने सहरका रूपमा जिल्ला ट्राफिक प्रहरी कार्यालय पर्साले वन-वे रूट कायम गरे पनि सो ठाउंमा ट्राफिक प्रहरीहरूद्वारा नै गद्दीका कारोबारीहरूसंग निश्चित रकम असूल गरी उक्त सुविधा प्रदान गरिरहेको बताइन्छ।
यसरी सो ठाउंका आलु ब्यापारीहरूलाई सुविधा प्रदान गरेको घण्टाघरस्थित ट्राफिक प्रहरीले बजार गर्न जाने आम उपभोक्ताहरूको मर्कालाई ध्यान नदिनुले निकै अप्ठयारो सिर्जना भएको माइस्थान बस्ने उज्वल श्रेष्ठ बताउछन्।
त्यसैगरी नगर क्षेत्र लगायत बजार वरपर छाडा हिड्ने गरेको गाइवस्तुले बजार गर्न जाने महिला, बालबालिका, वृद्धवृद्धाहरूलाई हिर्काइ घाइते समेत बनाएको बताइन्छ।
यसरी अव्यवस्थित रूपमा सवारी पार्किङ एवं छाडा गाइवस्तु हुंदा समेत सम्बन्धित निकायले केही नगर्नुले नगरवासीलाई निकै मर्माहत तुल्याएको नागरिक समाजको गुनासो छ।