अवैध रूपमा ढाट राखी धमाधम कर असूली

-अजय यादव, बारा, २३ मंसिर। बारा जिल्लाको कबही गाविसको सडकमै ढाट राखी अवैध रूपमा कर संकलन गरिरहेको समाचार प्राप्त भएको छ। जिल्ला विकास समिति बाराले यसप्रति कुनै ध्यान दिन सकेको छैन। भारतबाट कुनै पनि सवारीसाधनसंग कर स्वरूप ४०-५० रूपैयाँ लिइरहेको बताइएको छ। केही दलका नेताहरूले यस्तो कार्य गर्दै आइरहेका छन्।
बरियारपुरदेखि सतगंज सम्मका लागि विदेशी संस्थाले कार्य गरिरहेको छ। सडकको काम गर्नको लागि उपभोक्ता समिति गठन भइसकेको छ। तर पनि यसरी अवैध रूपमा कर लिनु गलत भएको गुनासो सवारीधनीहरूको छ। ढाट नजिकै इलाका प्रहरी कार्यालय कबही र सतगंजमा सशस्त्र प्रहरी बलको क्याम्प रहे पनि यसतर्फस्थानीय प्रशासनले केही गर्न सकेको छैन। यर्सतर्फ जिल्ला विकास समितिले ठोस कदम चाल्नुपर्ने स्थानीयवासीको भनाइ छ।