देश अहिले जटिल मोडमा- देउवा

वीरगंज, १७ मंसिर। पूर्व प्रधानमन्त्री एवं नेपाली कांग्रेसका वरिष्ठ नेता शेर बहादुर देउवाले देश अहिले जटिल मोडमा उभिएको आशंका व्यक्त गरेका छन्।
आज वीरगंज-१७ पिपरामठमा रहेको नृसिंह माविको नवनिर्मित कक्षा १२ को भवनको उद्घाटन गर्दै उनले भने संविधान निर्माण र शान्ति प्रक्रिया लागू गर्नुपर्नेमा माओवादीले नयां नयां अडचन लगाएर विवाद सिर्जना गर्न खोजिरहेको छ।
देउवाले राष्ट्रपतिको कदम ठिक रहेको भन्दै माओवादी अहिले सत्ता कब्जा र हिंसक गतिविधिमा लागेको आरोप लगाए। जनतालाइ धम्की दिएर देश कब्जा गर्न माओवादीले बिर्सिनुपर्ने कुरामा जोड दिदै माओवादीलाई वार्तामा आउन आग्रह गर्दै देउवाले माओवादी वार्तामा नआएको खण्डमा देशमा ठूलो दुघटना हुने चेतावनी दिए।
सोही कार्यक्रममा पूर्व शिक्षामन्त्री विमलेन्द्र निधिले राजनीतिक दलहरुले संसद अवरुद्ध, चक्काजाम गर्नुभन्दा रचनात्मक आन्दोलन गर्नुपर्नेमा जोड दिएका छन्।
उनले भने कांग्रेसको दुइवटा एजेण्डा- शान्ति प्रक्रिया र संविधान निर्माण रहेको छ। देशभरका २८ माओवादी शिविरको व्यवस्थापन, माओवादीद्वारा कब्जा गरिएको जग्गा फिर्ता तथा संविधान निर्माणको संघीय लोकतान्त्रिक गणतन्त्र बनाउने रहेको कुरामा जोड दिए।
निधिले दलहरुबाट अलग अलग धारणा आइरहेकोले संविधान निर्माणमा अवरोध र्सिजना भएको बताए। दुइ पर्षभित्र संविधान निर्माण गर्नुपर्ने र ६ महिनाभित्र माओवादी लडाकू व्यवस्थापन गर्नुपर्ने समय रहेको हुंदा माओवादी जिम्मेवार हुनपर्नेमा जोड दिए।
कार्यक्रममा सभासद् अजय द्विवेदी, रमेश रिजाल, पूर्वमन्त्री सुरेन्द्र चौधरी, सभासद अजय चौरसिया लगायतको उपस्थिति थियो। तस्बिर- उत्तम खडगी