बन्द, हडताल गरेर माओवादीले सत्ता नपाउने ठोकुवा

काठमाडौं, पुस ६। एमाले पोलिटब्युरो सदस्य केशव बडालले माओवादीले सडक आन्दोलनबाट कहिल्यै पनि सत्ता प्राप्त गर्न नसक्ने ठोकुवा गरेका छन्। रिपोर्टर्स क्लब नेपालको साक्षात्कार कार्यक्रममा बडालले भने- त्यस्तो दिवास्वप्न कहिल्यै पूरा हुने छैन। सक्छ भने संसदमा ३०१ पुर्‍याऊ। नसके आन्दोलनका सबै कार्यक्रम फिर्ता लिएर सहमतिमा आउनुको विकल्प छैन।
नेता बडालले सबै खाले सहमतिको बाधक माओवादी नै भएको आरोप लगाए। उनले भने- माओवादीको आम हडताल देशको आर्थिक अवस्था जर्जर पार्ने र मुलुकलाई सोमालिया बनाउने खेल हो।
कांग्रेस नेता मनमोहन भट्टर्राईले माओवादी सत्ता कब्जाको नीति स्पष्ट भएकाले अव दलहरुसँग सत्ता छाडिदिने या भिड्नुको विकल्प नभएको बताए। माओवादी सडकबाट सत्ता कब्जा गरेर एकदलीय तानाशाही लाद्न चाहेकाले लोकतान्त्रिक शक्तिहरु माओवादीको फासीवादी चरित्र विरुद्ध भिड्नुपर्ने बेला आएको उनको भनाइ थियो।
सोमबार रिपोर्टर्स क्लब नेपालका अध्यक्ष ऋषि धमलाको सभापतित्वमा सम्पन्न साक्षात्कार कार्यक्रममा सद्भावना महासचिव अनिलकुमार झाले माओवादीले जतिसुकै बन्द, हडतालबाट कहिल्यै सत्ता पाउन नसक्ने बताए। उनले भने- माओवादीको आन्दोलन कार्यकर्ता केन्द्रित छ। उसले भन्ने गरेको नागरिक सर्वोच्चता जनतालाई दुःख दिन मात्र सफल छ। आफूले भनेजस्तै हुनुपर्ने ढिपीले भोलि शान्ति सम्झौता पुनर्मूल्याकन गर्नुपर्ने अवस्था आउन सक्ने उनले चेतावनी दिए।