१९ पुस, वीरगंज । भारतिय जाली नोटको कारोबारमा संलग्न राष्ट्रिय जनता दलका अध्यक्ष यूनिस अन्सारी काठमाडौंमा पक्राउ परेको समाचारसंगै मध्य तराईको बारा, पर्सा र रौतहट जिल्लाका जालि नोटको कारोबारीहरु विच ठुलो हलचल मच्चिएको छ ।
जाली नोट कारोवारीमा अन्तराष्ट्रिय गिरोहका प्रमुख नाईके समेत कहलिएका युनुस पुर्व मन्त्रि सलिम मियाँ अन्सारीका छोरा हुन् । अन्सारी २० लाख भन्दा बढी नक्कली भारतिय रुपैयाँ सहित शनिबार राजधानिमा पक्राउ परेपछि मध्य तराई क्षेत्रमा जाली नोटको सञ्जाल फैलाउने सो गिरोहका सदस्यहरुवीच अहिले खैला बैला मच्चिएको छ ।
प्रहरीले विगतमा जालीनोटको कारोबारमा संलग्न भएको आरोपमा वीरगंजको गहवाबाट साजिद अन्सारी सहितको गिरोहलाई पक्राउ गरेपछि यस धन्दामा पुर्व मंत्रि सलिम मियाँ अन्सारीका छोरा युनुस अन्सारीको संलग्नता रहेको आशंका गरीए पनि प्रमाण नभेटिएको कारण पक्राउ गर्न नसकिरहेको अवस्थामा २० लाख भन्दा बढी भारतिय जालि नोट सहित अंसारी पक्राउ परेपछि अव सो कारोबारमा संलग्न सञ्जालको पर्दाफास हुने दाबी पर्सा प्रहरीले गरेको छ ।
युनिसको पक्राउपछि उनको कारोवारलाई सघाउंदै आएकाहरुले समातिने डरले भागेको पारिवारिक श्रोतले जनाएको छ ।
नक्कली नोटमा अन्सारी संलग्न रहेको चर्चा लामो समयदेखि चल्दै आएपनि नेपाल सरकारले यसअघि उनलाई एक पटक पनि पक्राउ वा सोधपुछ गरेको थिएन । भारतीय विदेश मन्त्री एसएम कृष्णा माघ १ गते नेपाल आउने भएपछि छिमेकी मुलुकलाई खुशी पार्नका लागि सरकारले युनुस अन्सारीलाई पक्राउ गरेको हुनसक्ने उच्च सुरक्षा अधिकारीहरुको भनाई छ ।
भारत सरकारले युनुसलाई पक्राउ गर्नका लागि पटक पटक नेपाल सरकारसाग आग्रह गर्दै आएको थियो ।
यता विगत केहि दिन अगाडि बारा जिल्लामा जाली नोटकै धन्दामा संलग्न भएको आरोपमा ताज महम्मद, शेर महम्मद लगाएत आधा दर्जन भन्दा बढी व्यक्तीहरुलाई प्रहरीले खोजिकार्य तिव्र पारेको र केहिलाई पक्राउ समेत गरेको दावि जिल्ला प्रहरी कार्यालय बाराका प्रवक्ता विज्ञान सर्माले बताउनुभयो ।
पाकिस्तानि खुफिया एजेन्सि आई.एस.आई र अन्तराष्ट्रिय अपराधिक गिरोह दाउद ईम्ब्राहिमको समुहमा संलग्न भई नेपालको भुमि प्रयोग गरेर भारतमा जाली नोट पुर्याउने धन्दामा युनुस अन्सारी नेपालको प्रमुख एजेन्ट भएको समाचार सार्वजनिक भएपछि भारतको दवावमा युनुस अन्सारी पक्राउ परेको बताईएको छ ।
विगत केहि समय यता तराईका जिल्लाहरुमा व्यापक रुपमा भारतिय जाली नोटको कारोबार बढी रहेको अवस्थामा प्रमुख नाईकेनै पक्राउ परे पछि अव यो धन्दा समाप्त हुने विश्वास यस क्षेत्रका बासिन्दाहरुले गरेका छन् ।
पक्राउ परेका युनुस अन्सारी हालै परीक्षण प्रारम्भ गरेको नेशनल टेलिभिजनका अध्यक्ष समेत रहेको बुझिएको छ ।- अनलाइनखबर
Comments
Post a Comment