२९ पुस, काठमाडौँ । क्षेत्र नं २ वीरगञ्ज मङ्गलबार क्षेत्र नं ३ काठमाडौँलाई ३५ रनले हराएर उच्च मनोबलका साथ बुस्ट यू-१६ राष्ट्रिय क्रिकेट प्रतियोगिताको फाइनलमा पुगेको छ । यसअघि, नै उपाधि भिडन्तमा पुगेको वीरगञ्जले यस जितपछि समूह चरणमा शतप्रतिशत सफलताको कथा रचेको छ । अर्को खेलमा क्षेत्र नं. ५ नेपालगञ्जले क्षेत्र नं. ६ बैतडीलाई १४७ रनले हरायो ।
राहुलप्रताप सिंहको ६८ रनको मद्दतले वीरगञ्जले पहिले ब्याटिङ गर्दै निर्धारित ४० ओभरमा १८७ रनको योगफल तयार पारेको थियो । गोपाल सिहले पाँच विकेट लिएपछि लक्ष्य पछ्याउने क्रममा काठमाडौँ ३८.३ ओभरमा १५२ रनमा नै अलआउट भयो । अर्को खेलमा नेपालगञ्जले निर्धारित ४० ओभरमा नौ विकेटको क्षतिमा २०४ रन बनाएको थियो । जवाफमा बैतडीको पाली १५.४ ओभरमा ५७ रनमा नै सीमित भयो । प्रारम्भिक बलरद्वय करामत खान र सउद अहमद अन्सारीले क्रमशः पाँच र तीन विकेट लिएपछि खेल एकतर्फी बनेको थियो ।
लिग चरणअन्तर्गत अन्तिम दिनका नतिजापछि नेपालगञ्जले तेस्रो स्थान बनाउन सफल भएको छ । त्यसपछि चौथो, पाँचौँ र अन्तिम स्थानमा क्रमशः काठमाडौँ, बैतडी र विराटनगर रहे । शीर्ष स्थानमा रहेको वीरगञ्ज र उपविजेता बनेको भैरहवाबीच बुधवार उपाधि भिडन्त हुनेछ । साभार- अनलाइनखबर
Comments
Post a Comment