गहुंको बिउमा मूल्यवृद्धि, कृषकहरू मर्कामा

-अजय यादव
बारा, २७ मंसिर। गहुंको बिउको मूल्यमा वृद्धि भएपछि बाराका किसानहरू मर्कामा परेका छन्। बारामा अहिले धमाधम गहुं र्छर्ने काम भइरहेको छ। तर जिल्ला कृषि विकास कार्यालयले किसानहरूको गुनासोउपर ध्यान नपुर्‍याएको किसानहरूले बताएका छन्। बाराको सदरमुकाम कलैयामा बिउ खरिद गर्नको लागि ग्रामीण भेगबाट किसानहरूको घुंइचो लागेको छ। कलैयाका बिज भण्डार संचालकहरू मौकामा चौका हानिरहेको कुरा कलैया-१३ बस्ने रामबाबु महतोले राष्ट्रिय दैनिकलाई बताए। उहांले भन्नुभयो- यस विषयतर्फकसैको ध्यान नगएको हुनाले किसानहरू मर्कामा परेका छन् । यता राष्ट्रिय बिउ विजन हेटौडाले गहुंको बिउ उपलब्ध गराउंदै आइरहेको बताइएको छ। बिउ बिजन हेटौडाले प्रति केजी ३४.५० मा गहुंको बिउ उपलब्ध गराउंदै आइरहेको छ भने त्यसमा पनि व्यापारीहरूले ६ प्रतिशत छुट पाउंछन्। कलैयाको दही बजार नजिकै रहेको राज बिज भण्डारका संचालक राजा साहले बताउनुभयो- जिल्ला कृषि विकास कार्यालय बाराले गहुंको बिउ व्यापारीलाई उपलब्ध गराउन नसकेकोले हामीहरू प्रति केजी रू ४१ रूपैयांदेखि ४३ रूपैयांसम्म बेचिरहेका छौं। यता किसानहरूको ढाड सेकाउने गरी मूल्य वृद्धि गरेपछि गाविस मनहर्वा-४ का कृषक जोखु यादवले भन्नुभयो गहुं र्छर्ने समयमा बिउको मूल्य वृद्धि हुंदा हामीहरू निकै मर्माहत भएका छौं। कृषि विकास कार्यालयको लापरवाहीप्रति आक्रोश पोख्दै हर्दिया-५ का कृषक वीरेन्द्र प्रसाद यादवले बताउनुभयो - यसपालिको अगहनी धान ३०-४० प्रतिशतले कमी भएको हुनाले सबैजसो किसान गहुं बढी र्छर्ने गरेका छन्।